絲絲講場：股神身家每日跳升2.9億

富豪情報供應商Wealth-X日前公布全球今年搵得最多錢嘅十位億萬富豪，其中高踞榜首嘅股神巴菲特，喺年初元旦起到上個禮拜三為止嘅345日內，進帳127億美元，即係平均每日賺3,700萬美元（約2.9億港元），令身家漲到591億美元，真係羨慕死絲絲喇！

股神今年咁順風順水，相信同佢嘅投資旗艦巴郡今年收購亨氏食品同NV能源有關。雖然巴菲特喺《福布斯》全球富豪榜入面暫時只係得個梗頸四，但據Wealth-X估計，佢老人家今年所賺嘅錢足夠挑戰Zara母公司Inditex創辦人奧爾特加嘅季軍寶座，出年有望重返三甲位置。

至於亞軍，就係暫時袋咗115億美元嘅微軟創辦人蓋茨，話說佢個人財產已經增加到726億美元，出年可能會喺《福布斯》富豪排行榜打贏現屆冠軍、墨西哥電訊大亨斯利姆，重登世界首富添。

而其他上榜嘅富豪依次包括亞馬遜創辦人貝索斯、facebook教主朱克伯格、軟銀行政總裁孫正義、Google創辦人貝林和佩奇、以及今年投資Netflix同康寶萊而大賺一筆嘅著名維權股東艾肯，佢哋截至上個禮拜三賺咗介乎72億至113億美元。

Wealth-X總結，今次上榜嘅十位超級富豪夾埋賺咗1,018億美元，人均資產按年暴漲41.6%，回報大幅跑贏標普500指數全年至今嘅24%！

余絲韻