「樓神」聖誕衝上雲霄
一向品味不凡，有「樓神」之稱嘅長實（00001）執行董事趙國雄（Justin），每次出席長實嘅推廣活動時總會悉心打扮一番，次次出場都令人眼前一亮，交足功課！尋日絲絲就收到Justin嘅聖誕電郵賀卡，今次又有新驚喜，佢帶埋長實市場及銷售部門同事一齊變身為飛機師，配埋副太陽眼鏡，呢身裝扮真喺入型入格！
寓意DIVA一飛沖天
Justin扮嘢出名早就響遍地產界，過去賣樓都曾經扮過大將軍、中東油王、醫生及楚留香等角色，每次都維肖維妙。
今次佢就變身飛機師，而背景就有長實總部長江集團中心同集團出年頭炮新盤，位於北角電氣道嘅「DIVA」冠名嘅飛機。唔知Justin今次扮飛機師，係咪寓意呢個新盤可以賣到一飛沖天，為一四年攞番個頭彩呢？
Justin啱啱早兩日先透露，DIVA總共提供118伙，兩房單位佔86伙，其餘就喺三房單位，重話會加快發布樓書及開售添。