絲絲講場：洋媒捧過龍 馬雲表忠誠
阿里巴巴主席馬雲嘅大名，喺國際科網、電商界無人不曉，英國《金融時報》選出馬雲為今年嘅「年度人物」都好正路，不過，佢話「我應該和政府相愛，但不要跟它結婚」，又講到明會同政府配合，又似乎唔啱西方嘅理念喎。
馬雲被選中，主因係佢帶領阿里，以至互聯網同電商行業創新，相比起其他科網創業者只係建立中國嘅Google、Twitter或Amazon，馬雲着力建設阿里嘅B2B電商業務，確係成功令互聯網電商出現根本嘅改變。
「官員講乜我都配合」
該報又話，馬雲今年五月退任首席執行官，並着力協助推動內地環保工作，成為內地企業家唔以「求富」作為人生全部嘅典範。
對於「雅虎中國」當年應內地政府要求提交電郵資料，令維權人士被捕嘅事件，馬雲回應話，即使係發生喺今日，佢都會作出同樣嘅決定，佢話：「我們為股東創造價值，股東不希望我們與政府為敵、走上破產命運」。
佢又話「不論（政府官員）說甚麼，我們都會配合。」又話自己經常同員工講「我應該和政府相愛，但不要跟它結婚。」
雷軍董明珠賭大啲
馬雲舊年攞過內地嘅「經濟年度人物」，當時同萬達集團董事長王健林，展開一場以天貓、淘寶雙十一促銷額嘅一億元「開玩笑」賭局。
喺今年嘅同一頒獎禮上小米科技董事長雷軍就有樣學樣，同格力董事長董明珠打賭，小米五年後銷售額將超過格力，董明珠就輸一元。董明珠見個賭注咁細，反建議賭夠10億元。
余絲韻