絲絲講場：友邦「紅衫軍」中環報佳音
友邦香港及澳門首席執行官陳榮聲尋日換咗套紅卜卜嘅風褸，同一眾八十後保險代理上街，今次就唔係好似蘇黎世人壽班代理咁遊行，而係提早為大家慶祝聖誕，又唱聖誕歌，又派曲奇，場面不知幾熱鬧。
絲絲行經中環，偶遇一班「紅衫軍」，拎住星形氣球，浩浩蕩蕩咁由友邦中環大本營出發，去到人流最旺嘅畢打街，佢哋周圍向路人派曲奇。
高管代理齊派曲奇
呢隊三百幾人嘅「紅衫軍」主要由友邦香港八十後前線保險代理組成，再加埋幾位管理層，陳榮聲、友邦香港及澳門市場及業務策略總經理謝佩蘭都落場，為忙碌嘅香港人送暖，仲開金口唱聖誕歌添！
喺畢打街唱歌嘅途中就發生咗段小插曲，因為呢班「紅衫軍」太多人，幾乎霸咗主要嘅十字路口，而且企喺某名店門口，最後有着住西裝嘅人出嚟交涉。香港人，難得Lunch Hour可以鬆一鬆，咁呢班「紅衫軍」都好合作，派晒曲奇，咪快閃囉！