美國職場網站Glassdoor「2014年最佳工作環境」企業排行榜周二出爐，貴為舊年總冠軍嘅社交網站facebook（fb），今年意外被國際顧問公司Bain取代，仲三甲不保，排名滑落至第五；就連喺科企界別，都畀分別排第二同第三嘅Twitter同LinkedIn超越。
蘋果公司（Apple Inc.）仲慘，今次排名只有第三十五，多數員工抱怨嘅並非管理層要求高，而係工時過長，令工作同生活之間攞唔到平衡。
其實好難怪，依家智能手機市場競爭激烈，淨係設計新產品都夠頭痛啦，希望Apple有朝一日可以解決到呢個問題。
到底Bain有乜嘢咁吸引打工仔，仲擊敗fb奪冠呢？據Bain有份參與調查嘅員工講，公司提供嘅培訓一流，而且幾乎每日、每個Project都絕無悶場。至於亞軍Twitter，員工就大讚每日充滿挑戰，唔會因為行家點做而隨波逐流，而且自己嘅努力成果會得到全世界嘅見證。
季軍LinkedIn方面，在職工程師讚揚公司十分關心同栽培員工，而且同同事相處往往得到好多啟發。
眾所周知，美國科企務求激發員工創意，工作環境都好舒適，難怪今年排頭十名嘅有七間都係科企啦！