金融業求才若渴，絲絲發現近期好多財金猛人復出，建行（00939）話中銀監已經批咗梁高美懿（Margaret）出任建行獨立非執董，其實自從Margaret卸任恒生（00011）副董事長兼行政總裁之後，好多銀行睇實佢嘅經驗同埋意見，結果建行成功奪得Margaret歡心。
雖然近排有啲傳言話Margaret可能會做中小型銀行主席，但若然屬實，Margaret食兩家銀行茶禮可能會唔多合常理，而且啱啱上任，仲做埋建行董事會嘅風險管理委員會主席，建行應該唔會咁易放Margaret走。
話分兩頭，建行亞洲前行政總裁馬志文今年中亦再出山，做上海銀行（香港）行政總裁，商務及經濟發展局前局長馬時亨唔單止做農行（01288）非執董咁簡單，今年撈埋保險，做富衛保險獨立非執董，所以話金融界幾咁等人用。
其實依家香港經濟咁好景，加埋中資銀行積極大展拳腳，有賓卡都同絲絲呻難請人，而且除咗「特派」管理層，銀行請「外勞」係好敏感，唔止管理層唔夠勁人用，就算落手落腳打仗嘅，亦唔能夠輕易請太多唔熟悉本地市場嘅內地金融界人士。
余絲韻