內地網購時不時發生烏龍嘢，今次就輪到四川移動。事情發生於幾日前，佢哋喺天貓網嘅網店竟然將原價1,999蚊（人民幣•下同）嘅小米3手機，錯手嘜到得899蚊，大大話話平咗一半有多，之後公司人員終發現錯誤，已即刻將手機下架，並且懇請網民退款，令公司避免損失。
有啲網民話當時見到咁平都覺得有問題，雖然四川移動好快將產品下架，不過當時已賣出1,700部手機，咁樣嘅失誤有機會令公司損失超過180萬，所以佢哋先要請求網民退錢，呢個方案對公司最有利。
不過，呢種方法相信網民唔會接受，四川移動仲有另一個方案選擇，就係以缺貨為由拒絕發貨，咁樣佢哋就要賠償商品價格30%畀買家，即係每部賠300蚊，咁樣公司就會損失50萬蚊左右。究竟會用邊個方案依家仲未知，絲絲認為唔應該輸打贏要，錯就要認，汲取今次呢個大教訓，下次一定會加倍小心喇！
余絲韻