人稱「股壇狙擊手」嘅富豪投資者艾肯（Carl Ichan），一直以家長式手段向管理差劣嘅公司施壓，佢最近接受訪問時話，依家敦促企業搞好管治比以前容易咗，雙方唔使好似以前咁發動投票代理權爭奪戰，令佢大感驚喜。絲絲都覺得，金融海嘯之後班維權股東活躍咗，而啲公司見股價停滯不前，都開始肯聽佢哋意見。
艾肯從未試過好似今年咁，一年內喺所狙擊嘅公司攞到超過六席董事。艾肯坦言，原來致勝之道就係唔好搞到關係咁僵。今年嚟講，最明顯嘅例子莫過於Apple，面對苦心婆心不斷呼籲回購股份嘅艾肯，Apple選擇多番展開友善對話。
其他維權投資者好似Jana Partners，即使冇話要攞董事席，今年有五間公司自動波應Jana建議搞好經營策略。微軟早排仲引入維權股東ValueAct Capital添！對比早年，啲公司同班搞事股東勢成水火真係兩個樣。
另邊廂，同艾肯打對台、沽空美國健康食品直銷商康寶萊嘅著名維權對沖基金經理阿克曼，已因艾肯、索羅斯等投資名宿嘅「夾倉」而慘蝕。「屋漏偏逢連夜雨」，有指康寶萊見近期股價做好，「牙擦擦」游說阿克曼嘅客戶撤資，搞到阿克曼依家仲要應付埋撤資潮！
幫康寶萊獻計嘅投行Moelis加多腳話阿克曼太過冒險。呢間行嘅舵手係同阿克曼相識超過十年嘅Ken Moelis，佢哋舊年一齊狙擊過寶潔（P&G），今次Moelis「大義滅親」，莫非阿克曼真係夠鐘認輸？
余絲韻