尋日大市一片靜局，但心水清嘅股友應該發現到中盈國金資源（00766）已經成功起飛，一日升逾兩成，全因「名人效應」奏效。呢位猛人喺財經界來頭可謂無人不曉，之唔係「民企之父」張化橋囉！。今年出完新書，估唔到咁快又冷敲去年剛注入放貸業務嘅中盈國金資源，擔任其企業管理顧問。
張化橋都算能者多勞，周身刀張張利，辭去瑞銀份高薪厚職後，隻身北上投身中國影子銀行，出任萬穗董事長一年，舊年仲開創The Slow Bull Capital Group（慢牛資本）打骰做埋主席。
話晒浸淫中、港金融圈子多年，唔少企業都希望邀請張化橋加盟，所以家吓佢亦兼任多間本港上市公司嘅董事，由復星國際（00656）、眾安房產（00672）、中國匯融金融（01290）獨立非執董，到博耳電力（01685）及奧思知（08325）非執董，都未計內地上市公司啲職務。
不過嚟緊一年，張化橋就會喺中盈國金資源坐鎮，為公司提供整體企業管治事宜嘅建議。雖然企業實務暫時就未見大消息，但尋日實際股價已令唔少股東放下心頭大石。
余絲韻