內地首富、地產界大佬萬達集團董事長王健林，舊年年尾曾經同阿里巴巴董事局主席馬雲有過一場一億元超豪賭局，對賭如果十年後電商喺內地零售市場份額佔比超過五成，王健林就輸一億人仔畀馬雲，如果達唔到，就變成馬雲輸一億。
可惜，只不過過咗短短一年時間，王健林已經轉軚，喺央視嘅財經論壇上面公開宣稱「億元豪賭就此作罷」，仲預告自己同馬雲好快會有合作。
天貓、淘寶喺今年「雙十一」促銷，交易額突破350億元人民幣，令到馬雲同王健林嘅「億元賭局」重新成為熱炒話題，事關馬雲喺宣布完「雙十一」銷售佳績之後，即時再單挑中國首富，要大家記住「如果二○二○年王健林贏咗嘅話，就係我哋呢個社會輸咗，係我哋呢代年輕人輸咗」。
講到咁嚴重，睇嚟馬雲對個賭局真係相當之重視，之不過，尋日王健林就話個賭局其實只不過係個玩笑。根據首富解釋，當年嘅賭局係應央視導演要求，喺台上搞下氣氛，根本唔可以當真。
佢仲即時宣布，萬達都有進軍電商行業，最快今個月就會開始推出網店同實體店嘅商業經營模式。其實絲絲都相信，個億元超豪賭局係玩笑多過認真，但係舊年仲堅守傳統商業模式嘅王健林，都話要進軍電商，令絲絲開始相信，如果個賭局持續，到最後可能真係馬雲贏面大啲。
余絲韻