Market Insight：燃氣股長炒長有

昨日港股得103點波幅，收市跌66點收報23,744點。年底前大堆IPO排隊上市，咪話對市況無影響，單係今個星期，有九隻新股截飛，故昨日大市主板成交得521億元，非戰之罪也。

「凍資王」信達資產（01359）今個星期四掛牌，還望到時釋放一些資金，個市氣氛會好番些少。幾隻IPO之中，唔少新股客熱搶殯儀股福壽園（01448），考慮到就算落埋孖展都未必分到好多下，古勝反而比較睇好，投機味無咁濃，但台前幕後班底信得過，兼且認講反應無咁熱的海螺創業（00586）。

古勝冇點你2013/12/11

萬里長空

科網濠賭股升唔停

基金經理捧新股，形成魚缸熱錢高度集中消息股身上，被阿里巴巴寵幸，齊齊去搞物流的海爾電器（01169）昨再升7.1%報22.55元，唔知有冇其他具備全國配送物流條件的家電商，會照辦煮碗？彈珠機DYNAM JAPAN（06889）早市以為要回，點知午後拗腰，收市倒升3.7%，報29.15元。

除賭股外，網股依然是炒家焦點，周一離奇開480元但整支大陰燭的騰訊（00700），昨日升0.8%報466.2元，雲遊控股（00484）升1.4%，博雅互動（00434）升8.1%創新高，IGG（08002）升4.1%。真係世界變，今浪前遊戲開發公司一般估值唔高，南韓及美國同業往往只係十多倍PE，主要基於電子遊戲周期短，要做到騰訊能夠長期漁翁撤網，推大堆遊戲博有三幾隻跑出，唔輕易模仿。

用量需求穩步增長

君可見，曾紅極一時嘅Angry Birds，今日仲有幾多朋友玩緊就知一二。不過，既然個市唔講理由，幾隻半新股亦被大孖沙收到乾晒貨，看官們總之清楚依家炒個勢，唔係同佢做人世就得。

近日祖國霧霾天氣嚴重，天氣預告預告白茫茫的PM2.5，好可能殺到落廣東。醫療及醫藥外，查實加快潔淨能源應用，才是中國政府更着緊要執行，改善霧霾情況的治本之法。國策扶持底下，預料「十二五」期間的城市天然氣需求，會比「十一五」時翻一番。

同燃煤、石油最大分別係，天然氣燃燒後只產生二氧化碳及水，對環境染污程度低得多。近排見燃氣股相當應節，由十一月中起步升勢平平穩穩，更多大行加入唱好行列，昨日美銀美林發表報告估計，預測明年內地管道的燃氣需求，將會維持在12至15%理想增長至1,650億至1,700億立方米。

由於燃氣價格較柴油保持近三成折讓，估計今年使用天然氣車輛會比去年大幅增加四成，去到10萬輛，此將有利從事氣站生意的昆侖能源（00135）以及新奧能源（02688）。

另外，古勝亦睇好半年業績撇除一次性重估影響增長逾八成的中國燃氣（00384），企穩10日線有再爆升勢頭，港華燃氣（01083）亦似在8.5元搵到支持，短期有條件挑戰早前造出的9元高位。

莎莎隨時食埋尾胡

眨眼又到聖誕新年消費旺季，在尖咀同旺角滿街都是同胞旅客，消費股自然受惠。昨日見到個別金飾鐘錶珠寶股有異動，東方表行（00398）升4.8%，周生生（00116）升4.5%。再睇睇化妝品股，莎莎國際（00178）微跌0.2%，卓悅控股（00653）則升1.1%。

回顧莎莎過去五年的走勢圖，五年中有四年十二月份股價按月錄得升幅。莎莎現價8.92元，若短線回吐守住20日移動平均線8.79元，博今年繼續開「大」，挑戰52周高位9.22元。

古勝