近期新股排山倒海湧出，多到幾乎名都唔記得，但提供殯葬服務嘅福壽園（01448）憑住其獨特業務，令人印象深刻，未招股先起熱潮。
公司仲打破傳統，無懼「唔老黎」習俗，特登揀孖「4」做上市編號、推介會又出現「4」號枱、推介地點係四季酒店嘅「4」樓，睇嚟佢哋真係一啲都唔信邪。
「4」喺中國人嘅社會，係唔吉利嘅數字，喺一啲大型場合或樓盤，呢啲數字通常都會「被消失」，不過，福壽園就揀正孖「4」做Stock code。
咁邊個坐四號枱呢？咪就係福壽園獨家保薦人花旗囉，張枱仲叫做「citi 4」呢！
最搞笑係，推介會嘅主家席坐咗「13」個人，證明佢哋唔單止打破中國人禁忌，西方嘅都唔驚。
絲絲聽講話，主席白曉江喺投資者推介會上，介紹完公司之後，就話歡迎投資者去佢哋上海個墓地，跟住全場靜咗，隔咗半秒白總就發覺唔對路，就兜番話，歡迎嚟參觀，全場惟有以笑嚟掩飾尷尬。
據聞福壽園成班管理層對「死」、「墓地」呢啲亳不避諱，當然喇，佢哋做呢行，冇人死又點有生意呢。