上個月阿里巴巴旗下淘寶網嘅「雙十一光棍節」，錄得超過350億元（人民幣‧下同）成交金額，威震中外，海外零售同網上銷售商無不驚嘆！當中嘅宣傳手法值得一讚，嚟緊嘅「雙12」（12月12日）又有新橋，就係要佢嘅客仔中「一定會出現一個土豪同埋一堆地主」。
淘寶早前表明，「雙12」會拎出3,600萬元回饋網民，好多網民都以為係「派紅包」（優惠券），點知淘寶尋日上載咗幅漫畫同網民講「你哋當中一定會出現一個土豪同埋一堆地主」，因為今次淘寶決定直接派錢呀！
淘寶喺官方微博公布，將會用3,600萬元買晒十二月十二日雙色球彩票嘅所有組合，仲會將彩票分畀網民。換言之，佢哋當中一定有人中到頭獎！內地雙色球彩票嘅原理同香港六合彩差唔多，淘寶網今次將會用3,544萬元將1,772萬注組合全部買晒，然後分畀網民。
由於組合畀淘寶買晒，所以出咩「冧巴」都好，無論係頭獎，二等獎、三等獎，抑或係安慰獎都好，統統都由拎到彩票嘅網民中晒，淘寶就預計頭獎將會由500萬元去到1,500萬元不等！
呢個「派錢」方法好吸引，究竟點先有機會分到彩票？淘寶就叫網民下載手機版淘寶App先，詳情喺十一號下晝7點鐘就會公布！
余絲韻