絲絲講場：卡梅倫幫合景樓盤奠基
英國首相卡梅倫訪華之旅告一段落，原來佢嘅尾站係成都，除咗食麻辣火鍋同睇民間技藝之外，絲絲仲發現佢去咗合景泰富（01813）當地旗下一個項目主持奠基典禮，絲絲聽合景老友講，佢相當親民，喺項目行足成半個鐘，仲有同啲工人握下手、傾下偈，盡顯親民一面。
環球匯英資佔五成
到底點解合景今次咁大面請到英國首相做嘉賓？因為呢個喺成都嘅環球匯項目，係由合景同具有英資背景嘅香港置地各佔五成共同開發，除咗卡梅倫，香港置地CEO彭耀佳、同系嘅怡和控股主席亨利‧凱瑟克同合景CEO孔健濤都有出席。
絲絲聽老友講，環球匯項目位於成都嘅一個「新金融中心」地段，將會發展成包括住宅、商場同埋寫字樓嘅綜合項目，投資額高達150億人仔，而早排絲絲都有去過睇呢個項目，包括新地（00016）、恒地（00012）等好多本港發展商都進駐咗嗰度。