HMV一度申請破產，然後畀私募基金匯友資本接收咗，睇嚟好努力創一番新景象，鬼主意多多嘅匯友老闆胡景邵（Kelvin）尋日就玩小兒科，開埋HMV Kids，實行將音樂種子，從小就植入小朋友度。
近年HMV轉型走「生活品味」路線，尋日仲開埋HMV Kids，開埋Playgroup同兒童藝術課程，直頭由小朋友細細個就培養佢哋對「生活品味」嘅「味蕾」，仲植根埋品牌忠誠，真係「好橋」！
以前齋賣碟嘅HMV，Kelvin好早前已經同絲絲講過，HMV唔可以再行「齋賣碟」呢條路，一定要轉行「生活品味」路線。
Kelvin「鬼點子多」，HMV喺佢嘅管理之下，之前已開完HMV Kafe，將Coffee Shop同HMV搞咗個Crossover之餘，估唔到依家搞埋啲細路哥！
作為HMV長期顧客嘅絲絲，忠誠度爆晒燈，真係好佩服Kelvin嘅創意。以後唔單止「音樂潮人」會去HMV買碟、歎咖啡，連「中產家長」及「港童」都齊齊幫襯HMV啦喂。