滙豐控股（00005）不務正業嘅部分，隨住出售非核心業務走向尾聲，啱啱連油畫都賣出埋，袋番960萬英鎊（折合1.217億港元），睇嚟銀行都係集中精力，揸高流動性資產穩陣。
兩幅出自意大利名畫家迦納萊托（Canaletto）手筆，名為威尼斯的里亞爾托橋（Rialto Bridge），同埋聖馬可廣場（St. Marks Square），市場原先估價係800至1,200萬英鎊，今次滙控賣個價都算中規中矩。
Canaletto嘅畫作以描繪18世紀嘅威尼斯而為人熟悉，好似有耶穌升天日慶典嘅聖馬可廣場、雷擊後聖馬可廣場鐘樓維修嘅情形等等，都變晒做佢筆下嘅名畫。
根據負責拍賣嘅蘇富比話，今次拍賣其實吸引到好多人出價，唔少係第一次對大師迦納萊托嘅作品出價，而投得嘅就係匿名人士。近年俄羅斯同埋內地富豪，十分鍾情藝術品，唔知係咪佢哋投到呢？
呢兩幅油畫以往嘅主人都係金融巨擘，之前擁有者係Safra Republic Holding SA，間公司喺九九年連埋兩幅畫畀滙控收購，但滙控依家先「剝離」呢啲資產，唔怪得好多人都話已經唔理解滙控嘅業務。
余絲韻