Market Insight：百貨股選擇吸納

彭博綜合大行預測，最新估非農職位增加18.5萬個（前月為20.4萬），一句到尾，今次係月中FOMC開會前的最後一份就業數據，太好怕退市早來，純針對股市的話，最有利可能是15萬至18萬個，低過預期些少，又唔好偏離太遠。

美股高位抖氣，港股又回到前時的膠着情況，恒指昨跌16點報23,712點，同三中全會《決定》曝光，翌日大市急升超過600點的收市價23,660點只係相差幾十點。當日港股成交激增至1,120億元，絕非靠一般散戶可以成就，信心大增的基金經理會唔會陰溝裏翻船？作最壞打算，可能個市要悶到本月中，聯儲局議息至有答案。

內容供應潛力更大

近期市場焦點在二三線股，或者股民都懶理個市係升係跌，久聞樓梯響的內地4G牌照，終於人人有份，工信部向現行三個網絡經營商中移（00941）、中電信（00728）及聯通（00762）發出4G TD-LTE許可證，但三隻股票收市變動唔算大，只有聯通跌1.1%較為差，大行預算領了4G牌後，三大網絡商固定資本投入至快，要去到一五年先見頂，估計推出服務的頭幾年，每戶攤分的折舊成本，同3G轉4G的月費收入提升，肯定不成正比。

古勝冇點你

萬里長空

最多分析員覆蓋，最有可能受惠的設備供應商中興通訊（00763）昨反高潮，高開低收倒跌散場，反而手機零件及OEM、ODM生產商炒到癲晒，比亞迪電子（00285）、富智康（02038）、中國無線（02369）及TCL通訊（02618）等統統搶高。查實推出4G，可見配備LTE傳輸速度的手機，需求有正面幫助之外，網絡流量大幅提升，對多媒體內容供應商、手機遊戲及手機購物的長遠幫助不容忽視，可惜本地選擇唔多。

不過，在第一視頻（00082）、IGG（08002）、博雅互動（00434）及雲遊（00484）之中，斷估至少有一兩隻有機會跑出，長遠投資價值應比手機生產工廠高。

百盛獲增持有啟示

大落後股中，最睇唔透算係內地百貨零售股，大部分近期同店銷售未見起色，摩根大通早輪走訪百盛集團（03368）及銀泰商業（01833）分店，話年終促銷折扣分別高達50%及40%。牌面計，真係無乜理由支持放錢落去，亦難怪早輪出第三季業績，衰到貼地的百盛被一沉百踩，由彭博系統28間有出報告大行，24間喊沽，4間建議持有，一面倒到極。

然而，金鷹商貿（03308）大股東王恒日前向交易所披露揸到5.01%百盛股權（買到踩過界的400萬股，成本價2.414元！），連行家都真金白銀支持，照計點都貼市過收二手資訊的分析員，故亦引起古勝興趣。王恒響朵始於去年國企王府井百貨收購春天百貨前，曾以私人名義買過春天百貨，雖然最後借花敬佛，搭了一轉順風車賣畀王府井，在股民眼中已塑造無寶不落形象，加埋金鷹與百盛份屬對手，所謂知己知彼，買得多少有把握。

身為圍外人，從第三季業績搵唔到理由，但睇番春天收購作價大約1.6倍市帳率，2.414元計的百盛不過0.98倍，未計手上商場價值有重估可能，數埋街外平得過佢仲有0.5倍的歲寶（00312）、京客隆（00814）及佳華（00602）。問題係size太奀，主觀認為零售業短期淡風難改，睇正路的銀泰同高鑫（06808）近排走勢可知一二，今次行家出手百盛可能有投機炒上空間，但切記要身手夠敏捷。

聖誕鐘買唔買滙豐？

昨日電訊及電訊設備股成「當紅」板塊，但論「黑仔」板塊，則大型國際銀行股莫屬。渣打集團（02888）發盈警，股價急挫4.6%，收報174.1元，市值唔見200億元！大笨象滙控（00005）亦已連跌三個交易日，昨日股價更失守250日線收市，搞到捧場客心慌慌！究竟股價係咪確認失守牛熊分界線，抑或咁好在聖誕鐘前震落去畀機會股民低價買進，就要做事後孔明！

古勝