相信返過內地嘅朋友都一定見識過內地流通嘅人民幣有幾殘舊，尤其係紙幣，張張都好似喺街市浸咗十日鹹水咁。有見及此，連內地商戶都唔想收啲殘舊紙幣，怕銀行唔收咁話，所以拒收舊銀紙喺內地都係一個幾普遍嘅問題。
人行可能都了解到問題嘅嚴重性，終於推出一套清晰指引畀銀行，等大家唔駛再口同鼻拗，手上揸住舊人仔嘅朋友依家有救喇。
根據最新指引，仲可以辨別到面值，含四分三張紙嘅，金融機構要按舊銀紙面值全數兌換；得返二分一張至四分三張以下，仲可以兌到舊銀紙面值嘅一半。
如果手上仲有絕版1分錢紙幣嘅，唔好意思，你只可以留嚟珍藏啦，銀行都唔會收，而5分錢就可以兌到2分錢。
今次新指引相信可以大大減低客戶同銀行間收舊銀紙嘅磨擦，同時又可以減少殘舊人仔嘅流通量，益埋用唔慣溶爛銀紙嘅香港人。
各位如果有爛咗嘅港紙，都可以拎去嗰張紙幣嘅發鈔行問問，如果係金管局發嘅，就拎去滙豐睇睇，銀行會視乎個別情況決定兌返幾多畀你，但最重要係張銀紙仲識別到唔係假鈔。
余絲韻