絲絲講場：柳傳志難忘飢餓歲月

依家聯想電腦唔單止係全國市場佔有率最大嘅公司，亦都攀升到亞太區第一，但聯想教父柳傳志昔日過嘅係窮困日子，至今都認為「可以吃餐好嘅飯」嘅感覺超正。

柳傳志對於想當年逢年過節搶食品嘅經歷仍然記憶猶新，佢話當時男人嘅重要任務，就係去菜市場去買菜，要一早喺菜市場開門之前就排隊，一開門就衝入去，咁至可以憑票買到定量供給嘅豬肉和雞蛋之外，仲可以買多隻雞。

如今逛超市，睇到琳琅滿目食品嘅佢，依然覺得好過癮，但依家佢只能夠「過眼癮」，因為自己已經進入咗「有豆沒牙」嘅年齡。

喺八十年代，當年仍然喺技術工程師嘅柳總，曾經試過連一碗飯都食唔起。

四蚊飯盒唔捨得食

當年佢出差去深圳，火車入面賣緊每盒四蚊人民幣嘅飯盒，當時飢腸轆轆嘅柳總就硬住頭皮話「唔餓」，直至落車見到一碗只賣五毫子嘅麵，先捨得食呀！

雖然依家已經名成利就，不過體驗過「飢餓」嘅柳總就話，「每當見到新一代用小部分薪酬就可以享用我哋過去連發夢都享受唔到嘅美食時，我就會覺得好高興」。

柳總咁有同理心，唔怪得喺金融海嘯嘅時候，聯想董事會都要求佢「復出」，帶領住聯想渡過難關啦！

余絲韻