投資名宿韋恩自八六年起，每年年頭都會發表「本年十大驚奇」，過去兩年命中率就高達50%，你都咪話唔把炮。但一個人無論幾聰明，總有失手嘅時候。韋恩今年公布嘅十大驚奇，起碼到今日為止，有八成都係錯嘅。
諷刺嘅係，落空嘅預言好多都同投資有關。例如佢話，內地滬綜指今年會升兩成，但至今跌近7%，期間試過跌兩成就有，即係今年六月「錢荒」嗰陣。韋恩又講過，歐股會因為歐洲經濟冇改善而跌一成，不過至今啱啱相反，累升超過一成。更加唔好提嘅，就係佢揚言會跌穿1,300大關，但上個月屢屢破頂、飆到1,800點嘅標指。
另外，韋恩話金價重上1,900美元，實情係試過跌穿1,200大關。油價方面，佢估計紐約期油今年下試70美元，但迄今低位都有86美元。佢又講過，氣候轉變會令農作物失收，刺激價格上漲，但玉米同小麥價格今年分別跌40%同16%。
除此之外，韋恩年初預言伊朗今年會整到核彈，點知伊朗新總統魯哈尼偏偏為咗氹西方解除制裁，主動放棄部分核設施，認真邪門。
令佢老人家比較安慰嘅，就只有日經平均指數受惠圓匯下挫而爆升；同埋共和黨為咗一六年總統選舉，為西班牙語非法入境者爭取公民權咋。
咁韋恩點睇出年嘅股市呢？佢預測股市出年好難再錄雙位數升幅，因為發達國需求疲弱，難以吸收全球過剩嘅生產，導致失業率偏高，資本開支不足。
余絲韻