Market Insight：水務股逢低吸納

在美股拖累下，昨日港股第二日向下，再跌181點報23,728點，主板成交不跌反升去到672億元。雖然係跌市，整體市況氣氛唔差，上升股份674隻要比下跌股份665隻為多，41隻股份升幅達雙位數字，觀乎升幅超過兩成的亦有10隻，三四線繼續有禾雀亂飛味道。

到底港府向曼谷發出紅色旅遊警示，會唔會促使退團旅客走去幫襯專業旅運（01235）自助遊，抑或本地確診首宗H7N9後，華南一帶市民少食雞多食豬，益咗雨潤食品（01068）？這類理由睇見真係人唔笑狗都吠，偏偏魚缸缺乏新消息入市，真係笑話當消息炒，兩隻股票分別升30.7%及10.5%，仲要成交似模似樣。家陣個市確實草木皆兵，人人變股神。

古勝冇點你2013/12/05

萬里長空

追住國策炒較正路

昨提過幾隻乳業股畀基金換貨，掟咗幾日成交縮晒，個樣似抖完氣，話口未完，藉國際全脂奶粉價橫行近兩個月，有再度抽升新聞，乳業股鑊氣返晒嚟，輝山乳業（06863）升1.3%，現代牧業（01117）上升1.4%，而潛緊水的原生態牧業（01431）升2%，雅士利（01230）升4.4%，始終對比純粹炒一兩日，無故仔跟尾的三四線，追住國策炒始終比較正路。

近一年大市其實好兩極化，有國策扶持同增長故事配合，大部分估值都高處未算高，好似乳業、互聯網、環保及再生能源股等；另一類基金一直提唔起大興趣，但考慮估值低殘卻偶有突擊，好似資源、水泥、電力設備及航運股，近期介紹中信泰富（00267）及中國建材（03323）都屬於後者，未必啱全攻型股民。

污水處理財源滾滾

今年最遺憾係錯過北控水務（00371）及光大國際（00257）兩隻倍升股，兩股的共通點係食正內地環保概念的專攻污水處理，且估值從來唔平，公司手上項目吸引，又不愁大孖沙自動獻金。好似北控水務，於九、十月分別向馬來西亞政府基金及北控集團旗下北控環境建設批股，收購的新項目貢獻又支持增長，將估值再推高形成循環，情況就有點像幾年前的中國燃氣（00384）。

國務院推《城鎮排水與污水處理條例》，規定縣級以上政府要把城鎮排水與污水處理納入社會發展規劃，鼓勵採取特許經營，或者政府購買服務形式的污水處理項目，為專攻污水處理的公司，提供更多合約機會。

大行估北水明年盈利14.5億元，一四年市盈率24.7倍，估值唔平但未至於好離譜。管理燃氣同污水處理公司，投資者預期未來幾年在市場滲透率擴大後，他們可以毫不費力保持增長，有調整低買機會固然要把握，就算無，似乎亦可把一部分注碼投入，免得錯過行業漫長的擴漲期。

收市後，熔盛重工（01101）發盈警，指市道疲弱下預告全年業績見紅，以上半年收入大跌71%，由舊年54.6億元跌到15.8億元人仔計，業績盈轉虧蝕2.9億元人仔，斷估無人預佢下半年可以反先，十一月股價由0.9元炒上1.22元，到底投機者對呢類醜股的決心有幾大，今日係一大考驗。

電訊設備股最得益

內地發放4G牌照，由年頭講到年尾，昨日終於成為事實！難怪中移（00941）股價逆市靠穩，而電訊設備股如中興通訊（00763）、京信通信（02342）及中國無線（02369）股價逆市升1至4%。

理論上，無論發牌後三大電訊商誰能得益最多，整體電訊設備投資增加，作為電訊設備業龍頭的中興必然是得益者。今年以來股價大翻身，亦係藉呢個概念炒上，現價已一定程度反映有關憧憬，未來股價能否更上層樓，就要睇公司經營交唔交得出成績。至於價位較細的京信，股價剛上破250日線，走勢轉強，短線回吐守住2.68元樓上，料可反覆向3元推進。

古勝