花名係「老虎仔」嘅遠東發展（00035）主席邱達昌，尋日拉埋孻仔邱華瑋（Andrew）出嚟，話要畀佢學吓嘢，唔好睇佢得廿四歲，原來已經有八年工作經驗，仲已經「轉過行」，由跟泰迪羅賓學打Band，變成阿爸口中嘅地產佬。
Andrew外貌黑黑實實，睇落幾捱得，佢自爆十六歲已經喺馬來西亞學做建築、地產，○八年正式做嘢，唔知係咪喺馬拉做咗兩年工，曬到咁黑。點解忽然返香港捱世界？佢話係阿爺邱德根嘅意思，阿爺有日話：「你老竇成日黐住我，你都應該黐住老竇」。
返咗香港都唔係即刻加入地產佬行列，Andrew鍾意作曲，仲跟過泰迪羅賓學打Band。既然老竇想佢入行，加上佢覺得作為創作人唔想成日唱同一首歌，但偏偏啲人只係想聽你最紅嗰隻。衡量之下，就入咗遠東發展，做業務發展經理，依家由入標買地學起，早排遠展入標美利大廈酒店項目，佢有份參與，仲爆料話出價35億，高過市場預測嘅上限，但就唔夠海港企業（00051）勇。
邱德根係唯一一個投資亞洲電視賺錢嘅投資者，邱達昌話依家市場競爭太大，唔會買返亞視，但就好佩服當年老竇嘅策略，唔同TVB決戰，又唔會不戰，只會避戰，「佢拍愛情劇，我咪拍古裝、武俠劇囉」。
余絲韻