絲絲曾經聽過內地溫州商人猶如金融市場嘅狼，只要聞到錢嘅味道，就一定唔會放過投資機會！而講到今年最牛嘅投資，就非Bitcoin莫屬，現時Bitcoin熱潮可謂席捲中國！
根據內地最大Bitcoin交易平台BTCChina（比特幣中國）嘅數據，上個月Bitcoin一度升至6,989元人民幣，較年初升值約90倍！有內地投資顧問話，最近唔少溫州人問佢有關Bitcoin嘅行情。
而除咗溫州外，一名收藏咗80枚Bitcoin嘅北京大學博士生亦聲言，「會當Bitcoin係養老金咁儲，唔漲個一千倍、一萬倍都唔會放！」
內地投資者對Bitcoin嘅需求實在大到難以忽視，難怪Bitcoin中國CEO李啟成期望當局能夠還Bitcoin一個名份，畀Bitcoin喺網絡上流通，並進行交易。
早幾日《金融時報》亦報道，英國皇家屬地海峽群島嘅奧爾德尼島（Channel Island of Alderney）計劃同英國皇家鑄幣局合作，發行實體Bitcoin，仲建議每個Bitcoin含有價值500英鎊（約6,360港元）嘅黃金，以防Bitcoin價值急挫，就算有乜「依郁」買家都可以熔咗啲金套現。
假若大家都好似絲絲咁掘唔到Bitcoin，倒不如買個實體比特幣先，話唔定遲啲真係可以兌換成網上嘅Bitcoin呢！
余絲韻