絲絲講場：盧韋柏捨不得43年情
大家都知一眾銀行高層經常周圍飛，一年365日都非常忙碌。不過，有位Banker十分有人情味，再忙都堅持押後周末行程，親自歡送公司嘅一位退休老臣子，佢就係花旗香港及澳門區行長盧韋柏。
親身答謝退休老臣
上星期五，一位喺花旗做咗43年嘅老臣子退休，喺依家呢個年代，要一條心做足43年，為同一間公司服務，確實係十分罕見。
花旗亦都十分識做，為呢位老臣子搞咗一個歡送會，特此表揚同埋感謝呢位咁長情嘅員工。
押後周末海外行程
日理萬機嘅盧生知道咗之後，亦百忙抽空出席歡送會，仲代表全體同事親手致送一個相架畀個退休員工，話希望佢可以永遠留住喺花旗工作嘅美好回憶。
呢位退休員工見到老闆咁有心現身送禮，可以話係光榮退休，應該咩辛勞都唔記得晒啦！
絲絲聽聞，原本盧生一早已經安排好周末行程，連機票都Book好晒，但得知老臣子退休，就堅持一定要親身祝賀，將原先安排好嘅行程押後。今時今日肯一心一意為同一間公司服務咁多年嘅員工真係好難得，識得咁愛錫一班員工嘅上司亦十分罕有呀！
余絲韻