Market Insight：資源股夠平博反彈

姑勿論最終數據係咪差到咁，零售商當然唔啱聽，但對唔想美國經濟太好，觸發聯儲局退市神經的華爾街賓架，肯定受落，要知零售業佔美國GDP近三分之二，和就業市場復甦愈背馳，聯儲局的退市只會係有拖無欠。

近期港匯持續強勢，反映資金持續流入港元區，遠的不提，自○九年至今，每次港匯貼住7.75強方兌換保證上限，港股都每每受惠。好似○九年第二至四季，恒指由13,576點升至最高23,099點，升幅70%，之後一次一○年第四季，港匯持續上升並短暫觸及7.75水平，恒指當時創出24,988點的海嘯後新高。

古勝冇點你2013/12/03

萬里長空

第三次是去年第四季，當時美國推QE3加上人民幣強勢，金管局連番干預下，港匯仍維持在7.75水平徘徊接近一個季度，恒指當時由20,840點低位，升至翌年一月高位23,916點，累積亦有14.7%升幅。

股民把握搵食機會

美國聯儲局主席伯南克以及下任提名人選耶倫，先後預告美國並不急於退市，也間接令港匯近月轉強，十一月至今維持在7.7550水平樓上。然而，港股年初或十一月初至今累積6.1%或3.4%升幅，表現是差強人意。或者，今年的確日股美股更具鑊氣，內地經濟復甦勢頭唔明顯，中資股被擺埋一邊。

另外，如果撇開指數，今年資金其實初期相當有選擇性，賭股、網股及乳業股升幅驚人，隨着這第一梯隊的估值漸漸超出盈利增長支持，近日有迹象資金全面轉向其他落後股，就連航運、煤炭等基本因素麻麻的股份，亦都唔理三七廿一搶高至算，市況有趨勢進入雞犬皆升的牛市中後期味道，今年押錯注的看官，真係要好好把握。

兩年半以來，大市終於企在兩萬四點樓上收市，恒指點數進帳唔多，二三線股卻炒得相當誇張，66隻股票創52周新高，26隻股票升幅一成以上。CEC國際（00759）再下一城，升32%收報4.13元，一個月內升278%，股民懶理阿信屋點樣將營業額變成盈利，實行炒完至算。鳳凰醫療（01515）創過11.96元上市新高後，收報11.48元仍升14.8%，極為貨乾。

中信泰富賣點欠奉

剛介紹隻DYNAM JAPAN（06889）昨升8.5%，居然遠不及有份入股的澳門勵駿（01680），升17.6%見7.13元，散戶同基金經理似乎深信賭場唔單止贏錢，直頭識印銀紙一樣。隨住港股隻鑊開始紅，人人變股神，古勝反而唔敢亂作介紹，最怕愛你等於害你，揀隻升得快跌得仲快就弊。

大大落後股中信泰富（00267），西澳鐵礦石項目等了又等，未見貢獻，上星期被大摩出報告叫人避開，睇7.7元淡過水。但牛市就係咁，大行當佢透明，近排鮮有介紹報告，但兩個字：夠平，昨日個市禾雀亂飛，佢升穿十月初高位11.62元。

計落短期真係無乜故事，唯獨澳洲央行話要扶持出口，話晒佢仲係藍籌，更重要係市帳率得0.52倍，只及近十年歷史平均值一半（○八年炒濃匯試過落過0.19倍！），如果連航運、炭煤及電力設備都唔啱嘴形，或者可以諗吓佢，先旨聲明，大升市買落後股一旦唔跟升，可能仲慘過坐艇輸錢，唔係個個股民承受得住。

內銀半新股可留意

祖國將推出優先股制度，意味商業銀行多咗一個融資渠道以充實資本。在如今人行嚴控市場流動性之下，對商業銀行而言未嘗唔係一件好事。事實上，若然內地魚缸真係重新上路，中資金融股料成上升動力來源，內銀股表現不宜過分看淡。呢期半新股有炒味，不妨留意兩隻內銀半新股──重慶銀行（01963）及徽商銀行（03698），勝在蟹貨唔多，加上招股作價估值唔高，博接貨的大戶收夠籌會開車快炒一轉！

古勝