孖妹S檔案：王澤基離教職最後一課

王：中文大學金融專業應用教授、金融碩士課程業界主任 王澤基

長賭必輸難逆轉

即十賭九輸。只要贏的機會率比輸的機會率低一點點，再加上長期賭博，積累下來輸的數目就會很大，最終破產。這是賭場能夠賺錢的重要原因，一個賭徒輸錢的原因是資本有限，儘管每次賭博的輸贏概率都是五五波，但賭徒要想不輸錢給莊家，只能建立一個基礎，即足夠資本，賭輸了仍可繼續。但人的精力和資本有限，幾乎不能做到無限次賭博，因此資本只會愈來愈少，最後愈來愈難翻本。

王：這個理論是經濟學，亦是統計學，基本上只要你持續做一些「輸多過贏」的事情，即你和對方長期嘅輸贏比率是49：51，而你永遠都是處於「輸少少」局面，長遠而言你必定變成輸家。

賭場便是個典型例子，一個人嘅賭本有限，但莊家嘅資本可以說是無限，只要你贏莊家嘅機會率低於50%一點點，隨着你不斷地輸錢，資本便會不斷縮減，在呢個過程不斷重複下，最終你會輸到破產。

應用投資上，如果你係注重風險管理嘅人，咁你嘅長期投資結果係唔會太差；相反你喜歡投機短炒，每次炒股都係輸少少，長此下去你就會輸好多喇！

高妹：我明白兩件事喇，第一：賭徒末路問題其實就係「輸開有條路」咁解；第二，以後炒股票時，我要確定至少擁有51%贏面先好出手。

折現主宰儲蓄享樂

十年後的1元，現在價值多少？這稱為十年的折現因子。數學化來講，如果i是折現率，n是多少年以後可以拿到1元，這1元是今天的價值，也就是折現因子=1/（1+i）n。從這個公式可見，折現率愈高，年期愈長，折現因子就愈低。

王：折現因子是指未來嘅1蚊於今天的同等價值，表達一個人對未來得益嘅在意程度。如果投資者覺得未來投資得益唔算重要，其折現因子就會較小，相反就會較大。

而不同年紀嘅人亦會有不同嘅折現因子，好似年輕人嘅折現因子就較低，因為佢哋缺乏耐性，急功近利，唔願意用今天較少代價去換取將來更大回報，所以一般年輕人唔太喜歡儲蓄，寧願把金錢花在眼前嘅消費享樂；相反，老年人嘅折現因子較高，佢哋明白儲蓄可換取將來嘅更多收入或回報。

高妹：難怪我炒股時，經常賺少少就沽貨喇，原來係因為我嘅折現因子較低，寧願先賺眼前錢，享受當刻嘅獲利快感，終於咪損失將來更大嘅投資回報囉！

贏家通吃 大戶愈強

即馬太效應，強者愈強、弱者愈弱。市場競爭中的少數勝利者獲得絕大多數甚至全部好處，大多數失敗者被淘汰以至無法生存。

王：物以罕為貴，愈少人擁有嘅東西，價值就愈高，舉例三卡鑽石比兩卡鑽石貴，兩卡鑽石又比一卡鑽石貴，原因係鑽石卡數愈大就愈罕有。

贏家通吃亦經常出現於競爭激烈嘅行業，例如金融業，但當中真正賺錢嘅人好少，夢想賺錢嘅人就好多，由於金融機構高層數目供應太少，只要你比別人擁有罕有學歷、技能、經驗，你就會成為贏家，比別人獲取高出很多很多倍嘅利益。我經常都說，在股市炒股係唔會賺錢，因為想靠炒股賺錢嘅人（需求）太多，而股市回報卻是供應有限。試問股市上有咁多投資專家參與，你如何贏到他們而賺錢呢？

彩兒：為了進身贏家通吃之列，我決定要將自己變身成一粒三卡鑽石！

如無必要 勿增實體

十四世紀英國邏輯學家奧卡姆人威廉提出「簡單有效」原理，即「如無必要，勿增實體」（Entities should not be multiplied unnecessarily），主張管理要化繁為簡。時至今日，奧卡姆剃刀原理常用於兩種假設的取捨上：如果對於同一現象有兩種不同假設，我們應該採取比較簡單的那一種。

王：一般而言，最簡單嘅理由多數都是最合理嘅解釋。正如你炒股輸了錢，假設有兩個原因，較複雜嘅係你無做基本分析、技術分析；較簡單嘅係投機性炒股根本就唔會贏錢，而大部人都會相信較簡單原因。

所以大家在面對一個現象時，第一個要問嘅並非對錯，而是有無足夠證據證明呢個結果不是運氣或偶然所造成。正如投資市場是非常複雜的，與其大家不斷做複雜性投資買賣，最終依然無法處理市場中既繁且多嘅訊息，倒不如選擇較簡化投資策略，無謂浪費時間與精力。

彩兒：唔通你暗示叫我同彩兒唔好成日炒窩輪、牛熊證？哈哈！

王澤基（Chak）小檔案

學歷 英國牛津大學經濟學碩士及博士學位；本科為中文大學與加州大學柏克萊分校，主修電子工程，副修數學與法文

工作經驗

巴克萊資本投行部董事總經理、瑞士銀行董事總經理、高盛執行董事、摩根士丹利數量分析師

榮譽 香港一九九五年羅德學人（Rhodes Scholar）得主

著作 《反轉腦袋投資學》、《男女博弈經濟學》、《主場經濟學》

基本經濟學六大邏輯思考方法

明白自己在說甚麼，對問題有清楚的定義

用事實和數據說服

分清楚偶然與必然

區別目標（End）與手段（Means）

時刻考慮機會成本（Opportunity Cost）

做判斷時要考慮到私人利益與公共利益的區別

資料來源：《主場經濟學》

高妹、彩兒

若有料報畀高妹同彩兒或有嘢問，可電郵money.biz@opg.com.hk