Market Insight：航運股輪流炒落後

周末，荷蘭失去標準普爾的AAA主權評級，降至AA+，主要考慮係經濟放緩程度比預期嚴重。而荷蘭失掉最高評級後，意味歐元區內仲掛住AAA的，剩低德國、盧森堡及瑞典，不過由歐元在消息後反應冷淡，繼續在1.3520至1.3600之間上落，可見匯商都有晒心理準備。

中國十一月官方製造業採購經理指數（PMI）為51.4，比大行預期的51.1好，也維持在二○一二年四月至今的十九個月最高水平。透過數據，或多或少看到十一月內地錢荒、拆息高企問題對製造業景氣的影響唔大。恒指夜期上周五高收23,999點，今日港股理應開兩萬四點樓上，且看歐美牛氣沖天配合底下，十二月港股能否挑戰海嘯後終極阻力位24,988點。

古勝冇點你

萬里長空

鳳凰醫療大戶力吸

超額認購532倍的鳳凰醫療（01515）上周五掛牌，即市最高見10.2元，收10元，貼住全日高位，比招股價7.38元升35.5%，抽到的皆大歡喜也。留意到鳳凰IPO「頭槌飛」（372張申請認購1,004.5萬股）各分5萬股，配售部分早前提過分到散晒，周五居然錄得2億股成交，等同全數新股第一日碌一轉。照道理，既然散戶同基金獲配唔多，沽咗食胡合情合理，但留意到周五100萬元以上大手成交有73%是主動買盤，加埋股價高收，多少反映對內地私人醫療市場鍾情的大孖沙買得相當狠，唔理佢係咪一三年40倍PE樓上，睇嚟升勢唔似得一日貨仔！

年底前，仲有十隻新股排住隊，唔使講主角一定係「不良資產收買佬」信達（01359），配售部分一早爆額拉閘，上周四缸邊消息指單是證券行借出孖展，已等於IPO超額25倍，呢隻要短線大賺幾成，肯定係奢望，但唔介意密食當三番，自問又鍾意抽獎的新股客，入飛博收爐前食番舖雞胡，贏面唔低。

Dynam具落鑊條件

今年濠賭股有幾厲害，心水清股民心裏有數，近期八到話今年贏到開巷的對沖基金，十居其九關鍵係揸重濠賭股。搵滄海遺珠，留意日本彈珠機股Dynam（06889）主席佐滕洋治，上星期業績發布會上話，日本政府明年四至六月會考慮是否開賭，一旦落實，Dynam會將投資重心移返日本，搵合作夥伴在東瀛開賭。

連日本政府批定唔批都未知，真真正正十畫未有一撇，可是日本經濟與樓市近期在首相安倍的強勢改革下，明顯有起色，也是不爭事實，可惜受惠弱日圓及日本經濟轉強的股份選擇有限，炒來炒去都係CEC（00759），照計Dynam都可以諗。近期公司亦都相當積極，頻頻見報，包括入股網絡遊戲公司IGG（08002），之前又斥資3,500萬美元入股澳門勵駿（01680），準備去澳門漁人碼頭設置彈珠機。睇番上半業績跌15%，至7.84億港元，主要受圓匯貶值影響，日圓計業績就升6.5%至99.3億日圓，大行估全年賺182.8億日圓，PE10.3倍，上星期五見大成交配合，創上市後收市新高（即市高位就要20.35元）。一句講晒，勝在夠平又有得吹開賭概念，如果成交今日唔縮仲挑戰20.35元，可以諗吓。

中海集運確認突破

近周有資金流入航運股，上周五中海發展（01138）股價創五十二新高5.33元，收報5.3元，升幅8%；中外運（00598）創五十二周新高2.55元；太平洋航運（02343）一度逼近五十二周高位，收市升3.5%，收報5.56元。環顧一眾航運股，論走勢中海集運（02866）股價表現相對落後，惟上周五股價表現都唔錯，升5%，收報2.09元。

技術上，中海集運剛現黃金交叉（10日線升穿50日線），上周五一度升穿250日線，成交明顯增加，若交投維持，確認突破牛熊分界線，短線有條件繼續追落後，目標上試九月高位2.36元，支持位可參考上周低位1.99元。

古勝