依家上網愈嚟愈方便，相信大家同絲絲一樣，經常用手機、板腦上網睇電視。雅虎女舵手邁耶睇準呢個趨勢，九月開始不斷羅致電視主播紅人，打造網上電視新聞報道平台，近日盛傳佢成功請到名嘴庫里吉（Katie Couric）過檔，呢位女主播來頭好勁，佢早年喺哥倫比亞廣播公司（CBS）報道晚間新聞，年薪多達1,500萬美元，相信為雅虎網聞平台生色不少。
邁耶過去兩個月積極挖角，一口氣喺《紐約時報》挖走科技評論家David Pogue、政治記者Matt Bai同埋編輯Megan Liberman。外界認為淨係邀得56歲嘅庫里吉坐鎮，足以令雅虎日後更易吸引電視廣告客戶。
邁耶接掌雅虎差唔多一年半，除咗不斷收購同業，引入新產品元素外，亦重新設計電郵版面，招聘更多工程同埋媒體嘅人才，但絞盡腦汁都未能轉化成顯著的收入增長。
分析員建議邁耶要變革就要變得徹底啲，搞新聞平台唔應該淨係煲重內容播放，仲話多線變革呢方面可以學下阿里巴巴。
余絲韻