Market Insight：金飾股有買趁手

今日掛牌的原生態牧業（01431），經營乳牛養殖、飼草種植及有機肥生產，業務同現代牧業（01117）好接近。奇怪近期乳業股因為一孩政策放寬及中央重點扶持乳業，相關股份炒到出煙，原生態算保守僅以2.7元定價，無進取到上限定價。

按此計原生態一四年市盈率17倍左右，平過現牧近三成，加埋淡馬錫及蒙牛乳業（02319）等大孖沙入股撐場，居然傍晚見到暗盤價只在招股價水平浮沉，係咪有咁大隻蛤乸隨街跳，今日有答案，如果手上有現牧，或可考慮沽些少換吓貨。

今日收市，大摩MSCI亞洲指數成分股權重變動，睇大行計算出預計較明顯資金流入（超過一日平均成交）的包括（按多寡次序）新世界中國（00917）、海天國際（01882）、合生元（01112）、北控水務（00371）、漢能（00566）以及中煉化（02386），流出股份有東方海外（00316）、大昌行（01828）、百盛集團（03368）、山水水泥（00691）、達芙妮（00210）、波司登（03998）、招金礦業（01818）、南航（01055）、瑞聲科技（02018）及中國燃氣（00384），看官們自己執生。

古勝冇點你

萬里長空

信達資產有利可圖

在一九九九年配合內地銀行改革成立，專幫內地金融機構收購不良資產的「收買佬」信達資產管理（01359），上市前路演進行得如火如荼，據知至少有8個基礎投資者入局，好不熱鬧。

可能子憑母貴關係，昨日香港的子公司信達國際（00111）早市狂炒，股價見過1.65元，股價於1.42元升37%後在下午兩點拉閘。口痕友話一定係基金欲免向隅，掃埋阿囝。不過，照計阿媽自己上市已經無咗借殼上市的可能，到底有乜搞作？惟有等公司通告。

講番信達資產，消息指招股價介乎3至3.58元，相當於今年預測市帳率1.13至1.31倍，同四大國有銀行「中、建、工、農」的一三年預期市帳率0.88、1.13、1.18及1.16倍比較，承銷絕對唔算賣大包。不過，大孖沙依然趨之若鶩，一句到尾，刻下買信達同買內銀股最大分別，在於享受到內地不良資產質素改善之餘，又唔使怕內地銀行業改革，未來息口進一步市場化的風險，如果基金經理要在內地金融資產上加注，面前信達是必然選擇。

此外，對於新股迷，古勝估計信達掛牌之初賺面頗大，當然，業務屬性唔同，大家千祈唔好期望會好似有雲遊控股（00484）、博雅互動（00434）或周五掛牌鳳凰醫療（01515）一類新股開波的癲法。

聯想可重見雙位數

近日執屋，搵到張○九年券行月結單，裏面一堆忘記點解要買，更唔知為何沽咗的股票清單，原來當時3元買過聯想集團（00992），計落揸到依家9.18元，等於平均每年28%回報，換轉普羅股民或者已經有早知無乞兒，諗吓如果時光倒流，應該瞓身唔使日日對住魚缸上上落落影響血壓同心情，可惜礙於工作關係，在下無乜可能咁長情。

講開又講，早排大行話智能手機商小米估值100億美元，聯想智能手機出貨多過小米近倍，有乜理由聯想連100億美金市值都未有，莫非PC生意斗零都唔值？結果，下半年聯想股價升三成，市值122億美元，一四年市盈率16倍左右，依家內地TMT股炒風咁勁，感覺仲未算好貴，睇嚟今年底明年初，有機會挑戰10元樓上。

消費旺季刺激銷情

又到咗年尾時候，嚟緊聖誕新年都係消費旺季，大量內地遊客到訪，同胞們一向喜歡「金」，汽車要「金」、手機要「金」、來港選購過節禮品，當然唔少得金飾珠寶。

事實上，周大福（01929）同六福集團（00590）將於今、明兩日公布中期業績，早前兩者均已先後發出盈喜，其中六福預計純利同比將大幅上升，主要受惠於強勁的黃金產品及不錯的珠寶產品銷售增長。

據早前六福公布的銷售數字，截至九月底止次季度，其港澳市場零售業務同店銷售增長三成，而內地市場增幅達七成。截至九月底止，六福在內地的自營店已達到79家，較港（42家）澳（10家）為多，未來內地市場將成新增長動力來源。

古勝