「土豪金」版iPhone 5s喺內地勁受歡迎，不過，如果咁爆嘅顏色放喺架車上面，唔知又有幾多人會鍾意呢？
尋日廣州車展開幕，全場金光閃閃，由廣汽吉奧到奇瑞瑞虎，全部披金戴銀，閃過閃光燈，但講到正宗「土豪金」，首推比亞迪（01211）嘅油電混能車「秦」。
不過，為咗等政府嘅新能源補貼政策，呢個新車款要十二月先正式開售，想做真正嘅「土豪」，大家要耐心再等多一個月。
「秦」係比亞迪寄予厚望嘅混合動力車，號稱有一千項專利技術，由起步到時速100公里只需要5.9秒，架車仲標榜慳油，揸一百公里耗油得1.6升，個車款舊年喺北京車展亮相後，就有唔少人睇好。
比亞迪個銷售經理話，因為要等埋新能源補貼政策出台，架車要等十二月先上市，暫定車價20.99萬人仔，公司預計每個月銷量有二千部。
廣州車展係內地三大車展之一，規模僅次北京及上海，所有汽車生產公司都會出盡王牌，好似東風（00489）、廣汽（02238）、華晨（01114）、吉利（00175）、長城（02333），真係睇到眼花撩亂。
余絲韻