絲絲講場：會公盤數靚 AGM唔敢鬆懈
如果大家不太善忘嘅話，應該仲記得香港會計師公會（下稱會公）去年度因錄得800萬元赤字而需要加費，令部分人唔滿意，卒之喺舊年年底嘅AGM（周年大會）上發難。聽聞今年財政狀況大為改善，睇怕唔使帶花生睇戲。雖然係咁，會公好有危機意識，事前會做定工夫。
800萬赤字轉盈500萬
絲絲發現，最近會計師公會行政總裁丁偉銓向會員披露，今年度會公嘅財政狀況已大幅改善，由有800萬元赤字，轉為錄得盈餘500萬元。換句話說，今年唔使再喺AGM提出加費建議喇。
會公今年度嘅AGM已訂於下月十三日舉行，既然唔使加費，唔知去年領導發難嘅「三子」，包括龔耀輝、鄭中正同馬振峰，仲會唔會喺AGM做場「大龍鳳」呢？不妨拭目以待！
陳錦榮資歷深或坐正
不過，前車可鑑，會公都不敢怠慢，今個月30號會率先搞場理事會選舉論壇，等啲候選人可以多啲同會員溝通。今年要重選嘅理事包括「三子」之一嘅龔耀輝。
AGM仲有一個目的就係選出新一屆會長，舊年趙麗娟做咗會公40年來首位女會長，咁今屆邊個會跑出？依家會公兩名副會長分別係陳錦榮及陳美寶，論資排輩，陳錦榮做會長看高一線。
余絲韻