Market Insight：汽車股強勢可延續

以近期道指累積的升幅，調整算係溫和，始終牛氣沖天下，華爾街投資者在兩個相對情況：經濟復甦及退市押後，樂此不疲地玩「公」我贏「字」你輸的遊戲，加埋傳統第四季又係美國股市及零售市場旺季，勸淡友都係無謂硬頸，疊埋心水等到一月睇伯南克講拜拜至算。

美國明年首季退市預測升溫，昨日所見反而對亞洲多個股市衝擊更大，唯獨短期為抵銷新消費稅對經濟構成衝擊，央行可能再開印鈔機的日本股市仲強勢持續，日經指數升1.9%報15,365點，去到近五個半月高位。

古勝冇點你201３/11/22

萬里長空

似乎經過近半年調整，日本股市對「安倍經濟學」信心也逐漸恢復過來，古勝相信要維持經濟增長及2%通脹目標底下，明年日本央行擴大QE機會唔細，可以睇睇日股ETF，好似價值日本ETF（03084）。

未必有買平貨機會

美國可能提早退市，再有阿布扎比皇室成員旗下基金同蘇黎世保險兩個外資分別沽售手上重農行（03618）及新華保險（01336），加上十一月滙豐中國製造業PMI縮番去50.4，按月跌0.5百分點，從昨日朝早種種客觀因素，加埋近幾個交易日港股經歷過千點的升幅，昨日埋單個市隊得120點，真係跌得少，也證明短線大市未必可以回補周初的上升裂口，畀大家買平貨機會。

看官如果心水清，可能留意近日在下只提券商同內險股，無提周一狂升的內銀股追定唔追好。查實，三中全會表示推行金融業改革，主打係利率市場化，對內銀尤其四大國有銀行不利，怪就怪在周初基金掃到癲晒，到底基金唔理三七廿一，總之成交同市值夠大補咗倉底先？抑或其他原因要買？個人認為前者可能性居多，加埋向來多買少賣的阿布扎比皇室都出貨，看來內銀仍是「上落市專用」一類。

米蘭站仲未返家鄉

昨日話境外熱錢流入加快，要睇實人仔升值受惠股，三隻飛機股隨即抽高超過9%，但都及唔上米蘭站（01150）誇張，一升就八成一。呢間上市僅兩年半之公司，唔知大家仲記唔記得佢係本地魚缸史上最勁超購王，打住個人遊受惠股，當年超額認購2,180倍，掛牌初見過2.93元比招股價1.67元高75%之後，之後幾乎無段好睇。

深潛中的米蘭站捧場客唔知有乜感想，但佢正好證明兩樣嘢：一是超購倍數同公司質素無直接關係；二是大股東掌握時機，例如業務高峰期上市及趁好價成檔生意賣掉，都遠遠比散戶優勝。

個市焦點開始去番唔受惠三中全會的股份上，中汽協數據十月單月銷量按年升24%，比首十個月累積升幅14%大，經銷商庫存減少之外，車價折扣亦有收窄的迹象，在無補貼下，零售需求比估計來得強勁，加埋第三季業績優於預期，車股近月強勢應可延續。

SUV（多用途車）近月銷情稍優於房車，長城汽車（02333）新型號H8登場，可先放入優先考慮之列，華晨（01114）第三季業績因為R&D費用延後入帳而大幅超過市場預期，十月底見過14.66元高位，近日在10日線浮沉消化升幅，昨成交回升股價未郁，破到13.5元應該仲有一浸行。

弱勢股年底或發圍

昨日先話睇幾時炒風吹到去批爛銅爛鐵同埋煤炭股，點知開口中咗一半，中煤能源（01898）及兗州煤業（01171）分別升3%及5%，恒鼎實業（01393）亦升5.6%。同樣積弱的航空股亦紛紛現大陽燭，令人眼前一亮！

其他中字股方面，首長系股份亦有異動，如首長國際（00697）及首長四方（00730）都有異動。至於鋁、銅等股份，就因為內地PMI數據遜預期影響而被「窒」住道氣，惟若年底前中資股整固過後又再發圍，帶領恒指闖24,000點大關，相信呢批超弱勢股份點都會跟炒一轉。

古勝