在職中產人士平日工作繁忙，有啲連放假都要OT做嘢，周身唔得閒。中銀香港（02388）為咗方便呢群客戶，率先提供一項24小時「在線對話」支援服務，呢項咁人性化嘅網上解答服務，連高端客戶都未用得住。
中銀香港個人金融及產品管理總經理龔楊恩慈（Ann）話，高端嘅「中銀理財」客戶遲啲都有得用呢項服務，但係以中產人士為目標客戶嘅「智盈理財」就可以率先享用。
智盈理財客戶嘅每月綜合理財總值，最低要求喺20萬元或以上，否則就要繳付120元嘅服務月費。多咗呢個戶口種類之後，中銀理財客戶嘅最低理財總值，就會由現時嘅50萬元增加一倍至100萬元，即時生效。
不過，現有中銀理財客戶可以延至二○一五年先受影響。Ann笑住話，依家仲有年幾時間畀未夠最低門檻嘅客戶努力。