接任阿里巴巴首席執行官半年時間，陸兆禧雖然唔似馬雲咁金句不離口，佢平和同務實嘅性格一樣令外界印象深刻。
佢最近接受外電訪問，講起自己喺短短15年內，由一個小小酒店接待員，到執掌中國最大電子商務公司嘅職業歷程，佢話，馬雲會跳出框架向前看，自己就專注眼前，其實大家性格好互補。
好多人話佢為人低調，不過，陸兆禧話已經隨時準備好，喺需要嘅時候扮演更加高調嘅角色，更多咁去面對公眾，只不過「需要啲時間」。
絲絲估唔到，陸兆禧畢業之後嘅第一份工，原來係喺廣州嘅酒店做接待員。直至幾年後加入阿里巴巴任職華南區銷售主管，而每次馬雲去廣東，陸兆禧就負責揸車帶佢去見客同演講，靠喺車程裏面嘅交流，大家開始真正了解對方。從此，陸兆禧就開始踏上青雲路。
陸兆禧話，其實當年大部分時間都係馬雲講，佢聽；馬雲瞓，佢揸車。就算馬雲今年二月約佢去上海外灘半島酒店飲茶，提出要佢接任阿里CEO嗰次，一樣係九成時間馬雲講嘢，跟住佢答「好」。
不過，依家隨住馬雲卸任CEO，領軍重任已經落喺陸兆禧身上，包括帶領集團整體上市。陸兆禧話已經做好準備改變低調作風，更多咁去面對公眾，但係就需要時間，同埋要首先完善自己喎！
另外，陸兆禧仲話自細嘅夢想係做建築工程師，後來讀咗酒店管理，但冥冥中佢加入阿里，仲做埋CEO添！