基金搏命追 經紀踢晒腳
港股昨愈漲愈有，豐盛金融資產管理董事黃國英直言要分秒必爭，目標昨早完成「平淡倉、買期指、減倉食胡」三大行動。
魚缸逼爆 散戶唔願走
上周五美股及港股ADR做好，黃國英已料港股會裂口高開，故要趁開市前，於九時十五分開市的期指市場部署：「我搏命追揸期指，追到23,400點才揸到（期指好倉）」，到現貨開市則買入高啤打值（beta）股份，同時要將上周的沽空盤平倉，「所有淡倉都冚晒先」。當所有部署及換貨完成，下午「無乜可做」，靜觀其變至收市。
他認為短線股市仍熾熱，除非恒指有跌回23,300點趨勢，否則待23,900至24,000點才大手沽貨獲利。
致富證券大埔分行經理朱永年說：喺九點半已全場爆滿，恒指喺下午三點開始急升遠超散戶預期，成交密集咗好多，令分行職員踢晒腳，中長線投資者多出貨食胡。
凱基證券元朗分行經理鄭仲嫺說：「恒指急漲，散戶都好開心，特別係長線持有內險股嘅散戶最開心，平時佢哋坐一陣會走，但尋日坐足成日，好似等睇好戲咁﹗」
散戶Thomas說：「近兩個月已買定奶粉股，都預咗港股開市會大升，但估唔到升得咁勁！望住奶粉股幾乎全線升，我忍手決定唔沽貨，因奶粉股估值仲算平，估年底前恒指見25,000點。」