阿里巴巴推出「來往」大撼騰訊嘅「微信」，內地兩大科網巨擘埋身肉搏，大家除咗有花生食，原來仲有阿里巴巴一班高層嘅無打格肉照睇添，相中見到阿里巴巴CEO嘅陸兆禧赤裸上身，拎住支咪演講，集團戰略部總參謀長曾鳴一樣打大赤肋，為陸兆禧呼叫吶喊，群情似乎相當激昂。
絲絲聽講現場係阿里巴巴內部一次「遠征南極」嘅誓師動員大會，「企鵝」就係騰訊嘅象徵，主席馬雲之前已經講過話要去南極洲逛逛，連員工都開始叫自己做「南極遠征軍」，今次呢班男高層又除晒衫，揚言要赤身打到南極去，擺到明向騰訊下戰書。
不過人哋企鵝嘅老家係南極，阿里巴巴一班高層故意唔着衫話要打到去人哋地頭，絲絲都覺得幾熱血嘅，但唔通真係一啲唔怕凍？
其實「裸奔」對阿里巴巴員工嚟講，簡直係一項光榮傳統，好多時高層同項目負責人完成任務指標後都會走去裸奔，甚至試過冰天雪地繞西湖跑一圈。近期內地最知名嘅裸奔事年，就係一○年，時任支付寶總裁邵曉峰以「裸奔」形式，慶祝支付寶日交易量衝破12億元人民幣。