絲絲講場：渣打High爆數碼分行
渣打集團（02888）董事會經常喺全球不同國家或地區巡迴舉行，今年揀咗香港，咁啱渣打香港位於中環德輔道中嘅首間數碼分行尋日正式開幕，所以罕有地分行開幕都有咁多重要董事現身，齊齊欣賞別開生面嘅「數碼醒獅」表演。
LED燈舞獅賀數碼化
除咗渣打香港行政總裁洪丕正之外，仲有幾位平時比較少喺香港露面嘅管理層，包括集團主席莊貝思同埋行政總裁冼博德。
銀行服務數碼化係大勢所趨，就連尋日嘅數碼分行開幕儀式上，都用新穎方式進行，五隻醒獅身上加咗LED燈飾，連冼博德都話同數碼分行嘅主題好配合。至於幾時再開第二間數碼分行，佢笑笑口話，咁就要等渣打發出邀請啦。莊貝思話，集團旗下用緊數碼理財服務嘅客戶超過三百萬，而且仲迅速上升緊。
裝修後客仔多四成
其實德輔道中分行喺正式開幕之前，已經營運咗四、五個月，渣打香港個人銀行業務主管禤惠儀話，分行裝修後，每月平均增加嘅新客戶比裝修前多四成。數碼分行嘅投資比傳統分行多，佢無透露增加幾多成本，但就話數碼化帶來嘅成本效益，需時十二至十八個月先至浮現。
余絲韻