Market Insight：4G發牌慎選電訊股

日前，澳洲央行議息後打晒開口牌，話澳元仲係太強不利出口。古勝錯愕是澳元自四月至今，已經由1.05撻到落執筆時的0.95水平，半年唔夠貶值超過一成，央行依然嫌少！難怪中國連串較預期強的經濟數據，靠出口煤油鐵去中國賺外匯的澳元，完全不為所動。

歐洲情況唔好得幾多，歐元區十月通脹縮到得0.7%，升幅創四年最細，分析員通街眼鏡碎，LTRO水喉大開仍幫唔到歐元區每八個就業人口裏面，有一個失業的事實（12%失業率），通縮陰霾依然揮之不去，通街估歐洲央行下一步，要加大再放水規模抑或連最後半厘息都要攞出嚟減埋佢。至於日本，首相安倍將消費稅由5%推高至8%之後，對復甦打擊多大，仲要時間觀察，不過普遍匯商唱淡，認為消費稅已窒礙推通脹上2%的計劃。

貨幣戰爭繼續上演

返到去原點美國，五月的退市論之後，伯南克已經彈弓手唔再提幾時退市，事實自五月退市論一出，美債息回升，美國樓市及就業市場復甦明顯減弱，真係講下都唔掂，主張退市的鷹派代表薩默斯退出聯儲局主席輪選，換上支持繼續直升機撒銀紙的耶倫登場。

古勝冇點你

萬里長空

美國頁岩氣開採技術有重大進展後，環球能源價格無因為熱錢氾濫而向好，值得留意，短短兩個月期油反而從112美元落到94美元，跌幅達一成六，考慮埋中國為首的新興市場，嚴重的過剩產能有待消化，環球通脹極可能有一段長時間在低位徘徊，央行自然肆無忌憚印銀紙，結合近日多國央行手影，似乎放水推低匯價的貨幣戰爭2.0，已經靜靜揭幕。古勝膽粗粗預測，一四年人民幣會持續升值（同貨幣供應增長有關），股市泡沫會持續擴大，資產價格亦好難掉頭向下。

散戶抽新股機會多

主打「鬥地主」及「德州撲克」手機遊戲的博雅（00434），超越雲遊（00484）成為今年凍資王，7.7萬份申請凍資868億元，難怪港匯近期強得咁離譜。雲遊及上星期美國上市的去哪兒（Qunar.com）掛牌首日大升32%及89%，以博雅陣容，首日升唔到三成可能捧場客都會失望。可惜這類全民抽獎，無論大戶、散戶一樣中得雞碎咁多，點計都唔夠保薦行咁和味，由雲遊及IGG（08002）上市後表現，呢類網股投資者十足十樓市買家，鍾情一手盤卻對二手毫無興趣，餘下兩個月，一堆公司排住等上市，搵餐茶的機會多的是，估計抽獎客會繼續貪新忘舊，隻雲遊可能要等多陣至有動靜。

四月開始，內地發4G牌的傳聞，幾乎隔兩三星期就傳一次，昨日又傳三中全會前後發牌。事實上，中移（00941）已開始發售4G LTE手機，實行搶押推出，博可以反攻在3G上先勝一仗的聯通（00762）及中電信（00728）。單睇股價，已經約略知道發展3G過度4G所引發後果，硬件及手機供應商得米，前期龐大投資的苦頭卻由網絡商承受。今年中移、中電信及聯通股價分別跌9.9%、7.4%及3.7%，反之中興通訊（00763）升29.5%，中國無線（02369）及TCL通訊（02618）更升33%及202%。

對於落實發4G牌，在下估計對季績奇差的中移刺激短暫，自主研發的TD LTE投資額未明外，另外兩間電訊商付予中移的網間結算費有可能要下調三至五成，三股中最低的估值，正預視未來業績的不明朗性，要三選一作長期投資的話，仲係傾向未來兩年盈利不難翻一番的聯通。

提防炒家隨時煞車

指數唔上唔落，炒家迫晒去炒股仔。昨日主板升幅榜中，排首位的是擬開店售化妝品的CEC國際（00759），股價急升41%；田生集團（00183）股價急升22%後中途拉閘；冠捷科技（00903）升14%、御泰中彩（00555）升8%、新環保能源（03989）升13%。睇形勢今日股仔仍是焦點，可以即市跟炒異動股。

但到咗周五就兩睇，皆因大家都想觀望周末三中全會召開會有咩講，此前或齊齊減倉，故要提防大、細價股都有沽壓。

古勝