絲絲講場:中銀助基層享數碼生活

細蚊仔依家做Project、搵資料,吓吓都要用電腦,不過就唔係每個家庭都負擔得起。中銀香港(02388)最近捐出2,000部電腦,仲捐多100萬元,該行營運總監李永逵仲連同IT部同事一齊出盡力教細蚊仔用電腦!

好多人鍾意追潮流,電腦Model舊咗就拎去賣,然後換過部新機。其實,如果唔等錢使,絲絲就建議大家拎部舊電腦去回收,等佢哋成為再生電腦,畀有需要用嘅人享受數碼生活嘅方便。

捐再生電腦 贊助軟件

中銀香港最近就用100萬資助電腦工場,送贈2,000台再生電腦畀基層家庭,又拎多100萬元出嚟,畀基層家庭更換電腦周邊設備同購買軟件等等。

事實上,中銀香港自○六年起,已經將再生電腦捐畀唔同嘅非政府組織。舊電腦可以循環再用,環保得嚟又幫到有需要嘅人,何樂而不為?除咗出錢,李永逵仲率領IT部同事教導過百名小朋友用電腦,幫基層家庭打破數碼隔膜。

余絲韻