絲絲講場：麥博士尋寶 揀到格魯吉亞
素有「新興市場之父」稱號嘅投資名宿麥博士，雖然今年已經七十有七，但作為鄧普頓新興國家投資團隊執行主席，每年都有250至300日，即係最多82%嘅時間出Trip，包括到有待開發嘅前沿市場物色投資機會。
最近美國財經網站Business Insider嘅記者，就喺位處西亞同東歐交界嘅前蘇聯加盟國格魯吉亞撞到麥博士，仲同佢老人家傾咗陣添。
麥博士話，自己今次去格魯吉亞嘅原因，係見到該國正朝向現代而公平嘅社會轉型。當地人話佢知，社會捨棄舊嘅處事方式，政府做嘢比以前有效率，貪污無咁嚴重。而講到投資格魯吉亞嘅風險，麥博士提醒，同好多國家一樣，當地政府有人貪腐，保守派政客拖慢改革，仲要密切留意佢同俄羅斯之間嘅關係穩定與否。
高管跳船高負債忌買
麥博士亦暢談點樣鑑別投資機會，話每次去新興國家，必定會參觀有興趣投資嘅企業，除咗同管理層開會，仲會搵佢啲客仔、競爭對手、甚至監管嗰個行業嘅政府機關傾偈。見到政客或者官員，例牌會問有冇打擊貪腐嘅改革，有乜促進經濟、減稅同時提高政府效率嘅計劃。
佢仲教路，如果見到一間公司高層員工嘅流失率好高，財務總監換畫，又或者負債高企，銷售額停滯不前，就要諗諗先。
余絲韻