絲絲講場：施密特幫港青闖科網
國際科技巨人Google執行主席施密特（Eric Schmidt）尋日嚟到香港，講點樣至可以創新同創業，施密特話香港係世界上其中一個成功孕育創業家嘅溫床，不過軟件業明顯不足。
好彩香港擁有網絡自由，對互聯網或科技發展有正面幫助，佢仲話好樂意幫手改善情況同推動本土文化。
強調創業要靠正能量
佢今次嚟香港，主要係宣布同香港中文大學合作推行創業培訓計劃，希望培養出新一代電子創新發明家，畀機會本地年輕創業家和大學生，同喺香港好難接觸到嘅導師交流，仲會贊助傑出成員去美國加州山景城總部同Google嘅專家會面。
有導師固然係好，但佢認為創業家需要不停提醒自已 「I believe, I believe, I believe」，聽落好似自我催眠咁，其實係不斷幫自己注入正能量，要相信自己正帶領公司走向正確方向。
好似eBay、PayPal、Walmart呢啲公司，創辦時規模好細，如果企業家能夠堅持，就可以成功躋身創業家之列。
欣賞小米幫Android開路
相比香港，佢覺得內地創業更艱難，佢承認Google喺內地發展停滯不前，但就唔後悔。
佢非常欣賞內地爆紅嘅小米，因為佢就係用Google Android系統開發手機。施密特大讚小米為佢哋增加潛在客戶，又話小米呢種平價Android手機模式好厲害。
余絲韻