Market Insight：熱錢流入港元資產

睇番昨日收市前先嚟大龍鳳，恒指以近全日高位收市，升457點報23,304點。港匯轉強，執筆時見過7.7525，退市預期降溫，資金又有流入港元資產的趨勢，或者，上周五港股跌穿橫行區而沒有急跌，是大戶請君入甕，將淡友一網打盡的招數。

內險股開始有睇頭

昨日提到踏入第四季中，有迹象基金資金轉移，從今年升得誇張的科網、濠賭及乳業股，轉為捧番大落後的內銀股。「中工建農」四大國有銀行再下一城，昨升幅介乎2.2至2.7%，國指亦因此升幅比恒指更大，達2.4%。內銀外，今年內險股一樣無乜睇頭，年初至今國壽（02628）、平保（02318）及太保（02601）股價累積跌緊18.1%、6.5%及3.5%，僅中國財險（02328）比較醒目，有13.3%進帳。

古勝冇點你2013/10/31

萬里長空

如果要四揀一，古勝一定揀平保，早前的第三季度業績，急升1.55倍賺54.29億元人仔，已經教通街睇淡內險的炒家為之側目，當然有死硬派會堅持因為去年比較基數低所致，今首三季累積賺233.3億元人仔，已經去到街外平均預測243億元人仔的九成五，短期勢必令大行進行重估，或者有人唔太睇重，在下留意業績中最艱難部分，平安銀行首三季有13%按年增長。息差擴闊，各方面營運數據都比大行估計理想，如果破九月中高位61.2元，今浪見65至66元，仲係相當保守的假設。

內地股債市近期表現麻麻，或者投資收益方面，短期難有提升，長遠也可能受市場開放競爭影響，不過一三年13.3倍（重估後應更低），處於近四年13至34倍區間之下限，股市對宏觀環境困難心裏有數，短期市場搵落後股及公司第三季績真係唔錯，可以搭一搭順風車。

酒股要翻身難度高

另一隻季績喜出望外係大唐發電（00991），第三季盈利按年及按季升1.5倍及88%，好過大行預測，原於燃料成本跌幅，比估計大，展望第四季，削上網電價及煤價開始站穩陣腳，業績應該無第三季咁勁，但以8倍預期市盈率及3.6厘股息，即使明年業績持平，估計短期股價應該可以從容咁，在3.4至3.8元之間上落。

睇外國新聞話今年法國及阿根廷兩大紅酒產酒國，葡萄失收，預算全球及歐洲紅酒產量，會倒退5%及10%，創上世紀一九六○年以來最低紀錄。反之紅酒文化盛行，環球飲家與日俱增（增長主要來自美國及中國），紅酒消耗量估計今年約有1%升幅，令供求呈大約3億箱缺口。

自中國嚴肅懲貪，紅白酒（葡萄酒及芧台）當水飲的豪氣不復再，法國名莊靚酒酒價，近一年多以來統統玩高台跳水，會否借短缺炒番一轉？看來機會唔大，一來飲靚酒需要陳年，二○○○年後幾乎隔年都話好年，有充足存貨畀愛飲酒人士消費，反而普羅大眾飲的紅酒仲可以諗諗，只可惜選擇真係唔多。

王朝酒業（00828）做咗「長停公主」，揸住長城葡萄酒的中國食品（00506）酒業收入比例唔高，通天酒業（00389）連續兩年半業績都無乜起色，不過咁，隻通天淨現金有9.7億人仔，已經超過依家7.8億港元的市值，睇番十月初股價橫行打底後，近期級級上，細細注玩亦無傷大雅。

公路股穩陣可小注

昨日其中一個異動板塊較生面口，就是公路股。深圳高速（00548）升3.1%、江蘇寧滬（00177）升3.4%、浙江滬杭甬（00576）升4.2%，可謂近年少見。

近日市場對三中全會議題揣測甚多，中資股可順手沾來炒作藉口，但當會議過後，相信只會有少數能延續升勢。跟風炒作，亦宜考慮股份基本因素，類似公路股，雖然核心業務增長動力不是太大，但勝在收益及經營業務現金流較穩定，近期人仔升值亦有助拉升估值，可順勢小注。

古勝