所謂「同車唔同命」，絕對反映喺比亞迪（01211）同美國電動車製造商特斯拉（Tesla）身上。比亞迪早前因為E6電動的士撞車後爆炸，股價大跌，特斯拉一樣係撞車，但刺激股價大升。
特斯拉呢排都算紅，負面消息都變成正面消息，服未？話說一位醉駕司機揸住特斯拉旗下嘅招牌型號Model S，喺墨西哥撞穿咗兩道水泥牆同一棵大樹後起火，仲發生爆炸，好彩冇搞出人命，司機仲感激特斯拉嘅安全性能，呢啲仲唔係另類宣傳？唔怪得之公司股價先跌後回升，可謂絲絲近年見過最佳嘅危機處理例子！
其實Model S早前曾經因為交通意外而起火，仲畀網民放上網，令特斯拉股價兩日累跌超過10%。但今次只係輕微調整咗3%至4%，投資者消化過安全性問題後，股價倒轉抽升，夠晒戲劇性。
咁啱蘋果公司（Apple Inc.）尋日公布業績麻麻哋，有分析員獻計，Apple應該出番部無敵iCar，特斯拉上個星期已宣布，撬走Apple Mac電腦硬體工程部副總裁菲爾德（Doug Field），擔任公司車輛規劃部新任副總裁，唔知Apple幾時自己研發番一部呢？