絲絲講場：高盛錫住新丁防跳槽
美銀美林投資銀行早前有位21歲嘅德國籍實習生，「朝九朝六」做到暴斃，令人關注投行嘅地獄式生涯，高盛年初就成立咗一個跨部門小組，研究點樣改善新入職分析員嘅工作環境。依家終於有好消息，令新人唔使通頂，喺工作同生活之間取得較好嘅平衡，願意留喺高盛。
改做長工 指令簡化
高盛出年將會請332名分析員，較舊年多23%，以攤分工作量，仲會取消目前淨係同佢哋簽兩年約嘅制度，改為一開始就係長工。此外，較資深嘅分析師要見客，新丁唔使寫百幾頁報告，寫個大綱就OK。高盛仲建立咗個網上平台，高層只要將指令擺上去就得，唔使分析員嘥時間慢慢查E-mail，而新人亦會有多啲機會得到上司嘅評價。
由於分析員工作排山倒海，晚晚OT，幾乎餐餐都要叫外賣，好多大行嘅Trainee合約未滿已急急腳走人，據聞比率超過60%。講到尾，高盛改革其中一個動機，就係唔想後生員工過檔返工時間相對理想嘅對沖基金、私募基金，或者津貼和味嘅科企囉。