絲絲講場：蘇寧「雲信」猛招箍客
近排內地嘅互聯網金融、通訊業務嘅變化，真係快到你唔信，幾乎日日都有新投資、新業務。好似短訊、群組聊天等發展，係兵家必爭之地。繼騰訊嘅Wechat、阿里巴巴嘅「來往」之後，蘇寧都加入埋，推出社交工具「雲信」。咁多選擇，以後絲絲同內地啲Friend聯絡，都唔知點揀至好。
今次蘇寧推出嘅「雲信」，同微信一樣都可以支持短訊、語音、群組聊天同微博分享呢啲功能，方便蘇寧同旗下商戶，同埋用戶即時溝通同互動。
趕下月面世谷購物節
蘇寧總裁助理李斌尋日拍晒心口，保證呢個新社交工具一定可以趕喺下個月八號之前推出，事關蘇寧計劃喺下個月八至十一號搞個O2O購物節，而「雲信」就係蘇寧嘅秘密武器之一，要靠佢即時向商戶同會員發布訊息，幫手促銷。
今次購物節除咗「雲信」外，蘇寧剛同弘毅一齊入股嘅在線視頻公司PPTV都會出一分力。
入股PPTV搞視頻消費
蘇寧會同PPTV合作，推出互動視頻購物，通過互聯網喺蘇寧全國過百間超級店、蘇寧易購站同蘇寧易購客戶端同步進行視頻直播，等廠商可根據顧客限時報名數量制訂折扣額度。蘇寧話，靠「雲信」同PPTV，今年嘅購物節好有信心可以實現100億人民幣嘅銷售目標喎。
余詩韻