Market Insight：資金轉炒內銀股

近排內地錢荒拖住中港股市級級落，人民銀行終於出手，兩星期以來首次逆回購放水，昨日推130億元人仔七日期逆回購操作，令一個月Shibor終止六連升，回番0.315厘報6.162厘，然而隔夜至兩星期拆息仲未肯掉頭，加埋市場認為中標息率4.1厘相對偏高，顯示水緊情況仲未完全紓緩。

昨日港股去到兩萬三點關口前腳軟，最多升過173點去到22,979點，之後A股急瀉一度倒跌見22,760點，尾市滬綜指跌幅收窄到5點，港股先好番多少，恒指最終收報22,846升39點，主板成交596億元。藍籌中，騰訊控股（00700）都算傷，跌3.3%收報418.4元，一隻股票拖低恒指51點。

古勝冇點你2013/10/30

萬里長空

燃氣股前景最穩定

事緣係隔晚美國上市搜狐（SOHU），收市後公布第三季蝕6,500萬美元，遠差過預期，拖累收市後電子交易大插16%，短期中國網股熱會唔會因而被打窒，仲要睇埋昨晚百度（BIDU）份成績表，但可以肯定，唔嫁又嫁想番香港掛牌的阿里巴巴集團股東們，見咁嘅形勢肯定愈嚟愈心急。

管道燃氣係少數內地經濟吹冷風底下，可以維持強勢的行業，中國燃氣（00384）發盈喜，預告九月底止半年業績比去年有強勁增長。查實發改委一早已放風，指內地首三季天然氣產銷情況理想，整體消費升幅13.5%，高於同期產量增幅9.2%，中燃昨日升4.3%報8.87元，以分析員預測一四年盈利增長大約兩成，每股賺44港仙，市盈率20倍，以增長條件唔算好貴，如果有機會見返8.5元樓下，吸引力會更大，加埋同新奧能源（02688），已是古勝兩隻長期心水。

昨日內銀股全線向好，農行（01288）表現最標青，升3.16%，「中工建」三行升幅介乎2至2.6%，睇到市後解畫，認為係人行逆回購消息所致。在下相信這只係佔部分原因，仲有其他包括已公布第三季績，普遍確係好過大行估計些少。

強勢股見食胡手影

另一個原因係，唔少今年升得勁的基金股，好似濠賭、乳業、科網同電訊硬件等熱門股，明顯見芬佬沽貨食胡手影，好似先係蒙牛乳業（02319）、合生元（01112）、網龍（00777），昨日輪到騰訊、金山軟件（03888）、銀河娛樂（00027）及金沙中國（01928）都散散哋。要知基金同散戶最大分別，係唔可能清倉揸住現金等收爐（好似傳統基金，揸現金好少多過4至5%），要搵地方泊住啲錢，今年無乜炒過、市值夠大兼且市盈率平到暈的內銀股，肯定是不二之選，尤其已經公布季績，短期進入消息真空期，勝在夠晒安全。

徽商銀行（03698）未上市先興奮，幾個基礎股東「圍晒飛」。徽商銀行招股，意外係萬科斥資30億元認購，掛牌後將會係大股東。若非善忘，年初佢先夥拍新世界發展（00017）高估價兩成投得荃灣西六區住宅項目發展權，一眾本地地產商不斷呻本地苦無投資機遇，這內房巨擘卻愈加積極來港投資，看來，一個新時代已揭開序幕。

科龍業務表現優異

傳統電視股受互聯網電視興起的挑戰，近期股價未脫弱勢。近日見到創維數碼（00751）主要股東入場增持，能否有助股價回穩，尚要拭目以待。

同屬家電股，專門製銷電冰箱的海信科龍（00921），今年以來股價反覆向上，昨日宣布第三季度純利同比大增1.1倍至4.71億元人仔，除了因為銷售保持增長及毛利率改善之外，收到格林柯爾系案件執行款令期內淨利潤增加1億元人仔。即使撇除特殊因素，核心業務表現仍勝同業，科龍股價有條件繼續跑贏同業及大市。

古勝