自從中金再生（00773）一役後，由「忠實粉絲」到「轉軚出貨」嘅西京投資主席劉央，已經久未露面，適逢近日中金再生清盤聆訊，劉央尋日現身，即成為焦點。
劉央曾經係中金再生嘅die hard fans，雖然後來都死咗條心，喺場外賤價沽貨，尋日提起中金再生主席秦志威，前幾日喺清盤聆訊時話自己係清白，問到劉央信唔信，佢都冇正面回應，只係話相信法律，相信法院會有公平公正嘅裁決，然後拋出金句「黑的白不了，白的黑不了」，咁睇嚟佢都預咗要撇帳喇！
近日市場熱話莫過於阿里巴巴集團上市一事，一向熱衷認購新股嘅劉央緊係有留意呢隻千億新股，仲話如果阿里上市，有興趣認購，不過都要個價位啱心水先得。對於阿里搞到滿城風雨嘅「合夥人制度」，劉央冇表態話支唔支持，淨係話佢投資公司時，最主要係睇公司管理層同埋行業前景，而阿里呢兩方面都無問題。佢仲認同馬雲講話時代已經改變，所以市場看法亦都要變喎。
講開科網股，股王騰訊（00700）愈升愈有，唔少散戶有得睇無得玩，原來連號稱「女股神」嘅劉央都大呻笨，話沽早咗、賺少咗。佢話之前三次買賣騰訊，但後悔喺420元已經沽咗，騰訊近日高位455元，真係戥佢揼心！