期指觀瀾：博單邊市未係時候
話口未完，近期決心等破位至追，昨日個市即刻示範蠱惑招，早市期指搶到23,530點後，淡友總動員反撲，亦以此為全日高位據點，級級落，全日即市反彈從無超過70點，回得極有秩序，且深度十足。如果早市心急以為破位追上，又唔逃生，真係傷亡慘重。
隔晚美國補發九月就業數據差過預期，進一步確認聯儲局短期難以退市的事實，十年期美債息已從早前高位3厘左右，輾轉回到2.5厘樓下。隔晚道指升75點報15,467點，預託證券顯示港股好大機會完全收復周二的跌幅，大戶結果在雙頂阻力位，炮製一個走勢陷阱，等好友踩入泥沼。
昨日恒指收報22,999點跌316點，基於恒指及期指都升唔穿周一高位，不至製造穿頭破腳的劣勢，但兩者單日由高位回落一度達535點及582點之多，以超過一個月得800點波幅的大市，並不是好兆頭。
今次在23,554點阻力前無功而回，會否先來一個大幅調整消化近月大市升幅？從聯儲局退市預期降溫，美債息大幅回落，資金回流風險資產的大環境看，個市要大跌似乎欠消息配合，但高位又阻力重重，22,743至23,554點的大型上落市仲未有破位迹象，若果想賭單邊市，或者仲要繼續等。
John Mullen