絲絲講場：港人健康倒退 陳榮聲有體會
香港人經常OT捱眼瞓見怪不怪！作為管理層嘅友邦香港及澳門首席執行官陳榮聲貴人事忙，平日點會有覺好瞓，所以佢一樣要靠周末瞓番一覺補番，昔日都仲會打籃球鍛煉身體，依家去戶外活動真係少之又少喎！
健康指數亞洲尾三
友邦保險（01299）一項調查顯示，港人健康指數只係得58分，喺亞洲區15個市場中排尾三，86%受訪者仲同意健康比五年之前差，佢哋仲面對一個新威脅，就係愈嚟愈沉迷使用社交網站或者上網，幾乎有64%港人做晒「低頭族」。
陳榮聲都一樣做咗「低頭族」！佢話自從有智能手機之後，就機不離身，咁咪即係工作不離身。同香港一般打工仔一樣，幾乎無放工時間，休息時間就梗係唔夠啦！調查顯示，港人理想睡眠時間係8.2小時，但係實際睡眠時間就得6.5小時，絲絲相信，一對對嘅黑眼圈就係咁樣造成。
平日唔夠瞓，除咗趁周末瞓番一覺補番，多數港人都會採用靜態活動減壓，好似睇電視、睇電影或者上吓網，做運動呢啲辛苦嘢一定擺到最後啦！
余詩韻