最近有人喺恒地（00012）中環總部見到前電視台靚女主播及前法巴輪后趙海珠（Alison），聽講佢近期去咗嗰度返工，入咗去營業部做Senior Manager。咁咪又由輪后變咗做賣樓女神，所以話，靚女係着數啲嘅，人稱珠珠嘅趙海珠轉到恒地，想必又可幫新老闆貨如輪轉！
絲絲搵過珠珠嘅主管韓家輝（Mark）求證，Mark哥話，好歡迎佢加入，相信珠珠喺財經界嘅經驗同人際關係，可以為公司效力，至於珠珠嘅新職位同負責咩範疇，佢就話暫時唔講得住。
不過，絲絲尋日三度打電話畀珠珠，佢唔係冇聽電話就係直飛留言，唔通佢份新工真係咁忙？其實，珠珠今年三月唔做「輪后」之後，專心湊仔，但曝光率依然唔少。佢除咗間唔中接受傳媒訪問講吓湊仔經，出席一啲品牌嘅活動，早前更喺DBC數碼電台客串財經節目主持、講咗窩輪約一個月。
由輪場轉戰地產，或多或少都要適應。不過之前由主播變輪后難度亦唔少，但珠珠都順利克服到。佢早前講過，喺法巴頭幾年係不斷考試、再半工讀MBA，先可以喺輪場站得住腳。讀MBA期間，更撮合咗佢同當時同學仔、現任丈夫Vincent嘅一段姻緣。兩人喺一一年結婚，愛情結晶品Hayden就喺今年初出世。
余詩韻